जनकपुर । रौतहटको देवाही गोनाही नगरपालिकामा  कार्यवाहक प्रमुखको जिम्मेवारी उपमेयर परनियादेवी पटेललाई दिइएको छ । नगरपालिकामा मेयरमा निर्वाचित धर्मेन्द्र पटेल अख्तियारको फन्दामा परेर निलम्बित रहेकाले उपमेयर पटेललाई प्रमुखको जिम्मेवारी दिइएको हो । देवाही गोनाही नगरपालिकाका निलम्बित मेयर धर्मेन्द्र प्रसाद पटेल आफ्ना सहयोगी सहित २३ औं दिन धरौटीमा रिहा भएका थिए  ।  विशेष अदालतले गत ७ गते सोमबार ४ लाख रुपैयाँ धरौटीमा मेयर पटेल र उनका सहयोगी अशोक पटेललाई रिहा गरेको थियो । अख्तियार दुरुपयोग अनुसन्धान आयोगले मेयर पटेल विरुद्ध भ्रष्टाचारको कसुरमा गत ६ गते आइतबार विशेषमा अदालतमा मुद्धा दर्ता गरेको थियो । तर पटेलको मुद्दाको किनारा नलागेकाले उनी निलम्बनमै छन् । मेयर धर्मेन्द्र पटेल,सहयोगी अशोक पटेल र २ जना नगरपालिकाका कर्मचारी गरि ४ जनालाई फागुन १५ गते हेटौँडाबाट गएको अख्तियारको टोलीले दुईलाख ५० हजार नगद र त्यतिकैको चेक सहित नियन्त्रणमा लिएर अनुसन्धान अगाडि बढाएको थियो । पक्राउ परेका ४ जना मध्ये देवाही गोनाही नगरपालिकाका २ जना कर्मचारी भने यस अघिनै छुटिसकेका थिए । अनुसन्धानका क्रममा मेयर पटेलले उपभोक्ता मार्फत भएको भवन निर्माण पश्चात अन्तिम भुक्तानी दिन घुस मागेको पाइएको अख्तियारका प्रवक्ता श्याम प्रसाद भण्डारीले बताएका थिए । मेयर पटेल तथा उनका पक्षधरहरुले भने उक्त आरोपको खण्डन गर्दै आएका छन् ।