जनकपुर । सरकारले बुधवार राति १२ बजेसम्म सार्वजनिक सवारीसाधनको भाडा नबढाए शुक्रवारबाट एकतर्फी रूपमा अघि बढ्ने यातायात व्यवसायीले चेतावनी दिएका छन्। पछिल्लो समय पेट्रोलियम पदार्थको मूल्यमा भइरहेको वृद्धिका कारण पुरानै भाडादरअनुसार सवारीसाधन चलाउन नसकिने अवस्था सिर्जना भएको उनीहरूको भनाइ छ। विगत आठ महिनामा पेट्रोल र डीजलको भाउ कैयौँ पटक समायोजन गरिए पनि सार्वजनिक सवारीसाधनको भाडा नबढेको नेपाल यातायात व्यवसायी राष्ट्रिय महासङ्घका महासचिव एवं प्रवक्ता सरोज सिटौलाले बताए। नेपालमा हवाई इन्धनको मूल्य बढ्नासाथ भाडा समायोजन गर्ने गरिए पनि गाडी भाडामा त्यसो नगरिएकोमा यातायात व्यवसायीहरूले असन्तुष्टि व्यक्त गर्दै आएका छन्।